Bakarra izan beharrean, aurrerantzean bi pertsona izango dira San Migel irudikatuko dutenak Corpus jaietako prozesioan. Ibai Gonzalez eta Julen Kortabarria izango dira, hain zuzen ere, eta txandakatu egingo dira; aurten Gonzalez izango da, eta datorren urtean, Kortabarria. Bestalde, dantzarien kapitaina ere, urdinez jantzita joaten dena, Iñigo Murgiondo izango da.
Kofradiako kide izan ohi dira prozesioan parte hartzen dutenak, Gonzalez eta Kortabarria ez dira, baina Jesus Irizar Txutxin-en esanetan "eurak dira aproposenak horretarako, edozeinek ezin du jantzi hori jantzi-eta. Gainera, gura izanez gero, izango dute aukera kide egiteko". Corpusen barruan, baserriko tresnen erakusketa zabalduko dute astelehenean kultura etxean, Lizargarate elkartearen 50. urteurrenari lotuta.