Natra Oñatik oso ongi jokatu zituen partiduko aurreneko 25 minutuak. Defentsako lan onean oinarrituta, atsedenaldira 12 puntuko errentarekin iritsi ziren, 35-23. Hirugarren laurdenaren amaieran, baina, hiru hiruko jarraian sartu zituzten bizkaitarrek. Markagailua estutu, eta partiduko azken minutuak jokatzen hobeto asmatu zuten Ibaizabalkoek Natra Oñatikoek baino. Oñatiarrek maila igoera lortzeko ilusioa zuten, baina azkenean Ibaizabalek lortu du, hain justu, hori, gaurko finalean Askatuak nagusitasunez menderatuta.
Eskubaloian, gauzak hobeto
Bestalde, Euskadiko Txapelketarako igoera faseko hirugarren jardunaldiko partidua jokatu zuen zapatuan Izarraitz Aloña Mendik Usurbil liderraren kontra. Rafa Zuluetaren mutilek 24-22 irabazi zuten, eta maila igoera lortzeko borrokan jarraitzen dute, ondorioz. Hirugarren dira sailkapenean, orain bigarren den Usurbilekin berdinduta, eta bost puntu dituen Tolosa lider berriarengandik puntu bakarrera. Datorren astean, oñatiarrek baino puntu bat gutxiago duen Barakaldo dator Zubikoara.
