Gipuzkoako Foru Aldundiaren Partaidetzako Aurrekontuen ekimena martxan da. Aurten hamar eskualdek hartuko dute parte, tartean Debagoienak, eta bailara hobetzeko bi milioi euro nola inbertitu erabakitzeko ekarpenak jaso gura dituzte Oñatin ere. Horretarako, kutxak jarri dituzte udaletxean, gaztelekuan, kiroldegian, kultura etxean, gizarte zerbitzuen bulegoan eta Lagun Lekun.
Gaur, eguaztena, partaidetza tailerra egingo dute, 18:00etan, Eteon. Bailara hobetzeko ekarpenak eta haien ustez eskualderako onuragarriak izan daitezkeen proposamenak egin ahal izango dituzte herritarrek tailer horretan .
