Hesian taldeak kontzertua eskainiko du gaztelekuan

Gaztelekuko erabiltzaileekin egindako batzarrean jaso zuten hezitzaileek Hesian taldea Oñatira ekartzeko proposamena. Kasu eginda, musikariekin harremanetan jarri eta bihar, egubakoitza, 22:30ean egingo dute nafarrek kontzertua. Sarrerak aurrez sei eurotan eskura daitezke, gaztelekuan, egubakoitzeko 20:00ak bitartean, eta leihatilan, bestela, zortzi eurotan.

Musika indartsua eta bizia, besteak beste, haize-tresnekin, nesken eta mutilen ahotsekin osatutako pop-rock eta punk-rock melodiko estilokoa da Hesianek Oñatira ekarriko duena.

2006ko udaberrian Etxarri Aranatzen jaio zen taldeak 400 kontzertu baino gehiago eskaini ditu Euskal Herrian zein atzerrian. Estudioko bost disko argitaratu dituzte; Maite dugu (2007); Herriaren Oihua (2008); Borrokatu eta irabazi, (2010); Hitzetik (2011); eta iaz urrian kaleratu zuten Hegalak Astinduz. Azkeneko lanean oinarritutako kontzertua egingo dute, kantu zaharragoei ere lekua eginda. Horrez gainera, Hemen eta orain zuzeneko CD/DVDa ere badute, 2013an grabatutakoa.

Zortzi musikari taularen gainean

Dantza girorik ez da falta izaten askotariko musikariekin betetako oholtzaren gainean. Franen eta Zuriñeren ahotsei laguntzen izango dira: Eneko (tronpeta); Aitor (tronboia); Iker (gitarra); Aritz (bateria); Xabi (baxua); eta Igotxo (saxoa).

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.