Apirilaren 23an da Liburuaren Eguna eta bezperan, Lurrinak & Liburuak ekimena egingo dute udal liburutegian. Hala, perfumeak ekarriko dituzte literaturak zer usain duen jakiteko. "Donostiatik etorriko diren bi neskek gidatuko duten kata berezi bat izango da. Perfumeak eta koloniak ekarriko dituzte eta nobela beltzaren, poesiaren edo liburu konkretu batek duen usaina antzematen saiatuko gara", azaldu du Arantzazu Ibarrondok, udal liburutegiko arduradunak.
Zozketa
Kata berezi horrez gain, beste bi ekitaldi ere antolatu dituzte Liburuaren Egunaren harira. Martitzenean, esaterako, Unai Iturriaga etorriko da. "Euskaraz ez daude komiki asko eta euskarazko tertulia taldeak Iturriagaren Haur besoetakoa irakurri du. Horri buruz eta komikigintzaz eta bestelako gaiez berba egitera etorriko da. Ekitaldi irekia izango da", azaldu du Ibarrondok.
Eguaztenean, berriz, ipuin kontaketa musikatua egongo da umeendako. Gonbidapenak har daitezke dagoeneko; Ostegun Kontalariak saiorakoak, astelehenetik aurrera emango dituzte.
Bestalde, hilaren 23ra arte izena ematen dutenen artean Zea Mays entzuteko eta Konposteroak antzezlana ikusteko sarrerak zozkatuko dituzte.
