Altxorra bilatzeko ahaleginean, frontoia txiki geratu da

Oñatiko Ganbara Txikiren Altxorraren uhartea lana ikusteko birritan bete zen zapatuan Oñatiko Zubikoako frontoia. Eta bete bakarrik ez, ikusle guztiak pirata bilakatu ziren, sarreran emandako bururako zapiekin. Giroan sartuta, ikusleek ordu eta erdi pasatxoko ikuskizunaz gozatu ahal izan zuten –atsedenaldiaz– eta saio bikoitza izan zenez, lanak ondo eginda agurtu zuten arratsaldea Aitor Biainek eta haren lantalde osoak (koadrila galanta ibili zen lanean). Egubakoitzean berandura arte egon ziren azken entseguak egiten, eta horrek fruituak eman zituen atzo, jendea pozik irten zelako frontoitik.