Oñatiko odol emaileen elkarteak prest du 2015ean egingo dituen odol ateratzeen egutegia. Hamar ateratze egingo dituzte; hilean bat, udako bi hilabeteetan izan ezik. Gaur, egubakoitza, izango da urteko lehen ateratzea.
Jaitsiera
Odol emaileen elkarteko kide den Pili Irazbalek azaldu duen moduan, "Iazko gorabeherei dagokionez, ez dago aldaketa handirik baina, hilabetez hilabete begiratuz gero, kopuruak zertxobait jaitsi egin direla ikusten da". Hori dela eta, 2015ari begira, herritarrei bi mezu luzatu nahi diete elkartekoek: "Dagoeneko emaileak direnei, ez daitezela hitzorduez ahaztu eta etor daitezela. Bestalde, inoiz eman ez dutenei, berriz, lehenbailehen odol emaile egin daitezela, besteak beste, jubilatzen ari direnak, ordezkatzeko".
Betiko tokian
Tokiari dagokionez, aurtengo ateratzeak ere Txantxiku ikastolako beheko pisuko aretoan egingo dituzte, betiko moduan, 17:00etatik 19:30era bitartean. Donostiatik mediku eta erizainez osatutako talde bat etorriko da ateratzeak egitera.