"Asko estimatzen diet omenaldi hau baina gaur nik jasotako bertso, opari eta besarkada denak omenaldian parte hartu duten guztiekin banatu nahi nituzke, hemen dauden gehienei konpondu diet-eta poltsikoren bat edo egin diet mozorroren bat", adierazi zuen Agirrezabalek omenaldian.
Zumarragako feria
Omenaldirako, eskuz egindako lan asko zituzten erakusgai jarrita Lagun Lekuko tabernan. Mantelak, tapeteak, mantak eta buruko zapiak, esaterako. Bazegoen duela 70 bat urte eskuz bordatutako mantel bat ere eta baita lehengo josteko makina bat eta patroiak ekartzen zituzten aldizkari zaharrak.
"Josteko tailer txiki bat dugu hemen, Lagun Lekun, eta horregatik pentsatu genuen Santa Lutzia eguna horrela ospatzea. Horrez gain, gainera, moxal pintxoak ere prestatu ditugu herritarren artean banatzeko. Hala, Zumarragako feriari ere keinu bat egin diogu", adierazi zuen Lagun Lekuko kide den Lourdes Ugartek.