Asteburu bete-betea
Gaurkoa izan da jaien irekiera ofiziala, baina sanmigelen bueltan antolatutako egitarauak joan den asteburuan eman zituen bere lehen pausoak, haurren danborrada eta artzain txakur lehiaketarekin. Asteburu honetan, berriz, ostiralean gogotsu ekin zioten jai giroari oñatiarrek, Amparo Sanchez eta La Jodedera taldeen kontzertuekin.
Atzo egun morea izan zuten txosnetan, antolatzaileen esanetan, jaietan "eduki feministendako espazio bat" sortzeko helburuarekin. Hala, jolasean, kantuan edota, besterik gabe, ondo pasatuz "kontzientzia feminista zabaldu" zuten, eta arratsaldeko olinpiada moreak izan ziren ekimen horren erakusle.
Bestalde, Santa Anan, Iparragirre Oñatin izan zenekoak ekarri zituzten gogora. Urretxuko bardoaren bizipenak "Gazte gaztetandikan" kontatu eta kantatu zituzten Olaitturri kultur taldekoek eta ikus-entzuleek gogoz kantatu zituzten olerkari ospetsuaren abesti ezagunenak.