"Asko gara Ganbaran. Guztira 300 bat lagun izango gara. Baina ahots berriak ere entzun gura ditugu eta horretarako egin dugu deialdia. Ganbara Txikin zein Ganbara Abesbatzan parte hartzeko deialdia da, ume, gazte zein nagusiendako", adierazi du Aitor Biainek.
Hiru bide
Ikasturtea irailaren 8an hasi zuen Ganbarak, baina parte hartzeko interesa duenak edozein momentutan eman dezake izena.
Ikasturte berri honetan ere hiru bide paralelotan egingo dute lana Ganbarako kideek. "Batetik umeen kantu eskola dugu. Bestetik, helduen kantu eskola. Eta hirugarrena, Ikastetxeak Kantari ekimena da. Aurten ere egongo da. Iraila osoan egongo da izenematea zabalik herriko ikastetxeetan", zehaztu du Biainek. Urte osoko emanaldien agenda ere lotuta dituzte. Kantu eskolak, gainera, kontzertu tematikoak egingo ditu hiru hilean behin.
Urteurrenen jarraipena
Bestalde, Ganbara Txikiren 10. urteurrenak eta Ganbara Abesbatzaren 20.enak, jarraipena izango du aurtengo kurtsoan.
Ganbarako zuzendari Aitor Biainek azaldu duen moduan, urteurren bietako ekitaldi gehienak joan den ikasturtean egin zituzten, baina oraindik ekitaldi bana gelditzen dira egiteko. "Ganbara Txikik, esaterako, Altxorraren bila izeneko musikala egingo du urtarrilean. Nagusien abesbatzak, berriz, Carmina Burana opera egingo du Gabonetan", aurreratu du Biainek.