Arropak, oinetakoak, jostailuak, eskolarako materia, pinturak... batu dituzte Argentinara bidaltzeko Hermansoloñakoek. Zehazki, Jose C. Paz herrira eramaten dute batutakoaren %80a eta gainerakoa herrialdeko iparraldera, Jujuy-ra. Bertan parrokia dute agustindarrek eta euren bitartekaritzarekin egiten dute lan erakundekoek.
Hermansoloñako kide den Jose Antonio Urteagak adierazi du jeitsi egin dela batzen duten material kantitatea. "Lehen hiru edukiontzi bidaltzen genituen urtean; aurten, bi". Hala ere, eskerrak eman nahi izan dizkie herritar guztiei, Oñatiko Udalari, Ulmari eta erakundean zein Argentinan lanean aritzen direnei. Bihar eramango dute edukiontzia Bilbora eta irailaren 28an irtengo da portutik.
Laguntza Kubara
Hilaren amaierara arte Hermansoloñaren edukiontzian batzen dena Kubara bidaliko da Acesma-ren bitartez. Ibis Rodrigez, Acesmako kideak, esan du ia prest dutela guztia, baina hainbat tramite egin behar dituztela materiala bertara bidali ahal izateko.