Bi nobedade nagusi ditu Aloña Mendiren aurtengo Garagardo festak: alkohol gabeko garagardoa eta limoia nahastuta duena ere zerbitzatzen ditu. "Guztira 10 garagardo mota egongo dira aukeran. Nobedadea izango dire bi horiek hiru eurotan zerbitzatuko dira, eta besteak, lau eurotan, joan den urtean moduan", zehaztu du Anton Intzak, Aloña Mendi kirol elkarteko presidenteak.
Txerria eta moxala
Garagardoarekin batera, baina, jatekoa ere badago Foruen plaza ondoko frontoian jarri duten karpan. "Urteroko karpa da, bai. 35 metro ditu luzeran eta 15 metro zabaleran. Mahaiak daude barruan eta hasierako urteetan eskaini genituen txerri-ukondoa eta saltxitxak jan ahal izango dira, adibidez, hantxe. Horrez gain, oilaskoak eta moxal-okela ere egongo da aukeratzeko. Estimazio handia izan du okela horrek eta aurten 200 kilo prestatuko ditugu", dio Antton Intzak. Ordutegiari buruz, 19:00etan zabalduko dute karpa gaur, eguena.
Bestalde, pantaila erraldoia ere jarriko dutela baieztatu du Intzak: "Mundialeko partiduren bat edo beste jarriko dugu, akaso, baina elkarteko sekzioen argazki zaharrak eta egungoak eta bideoak botako ditugu".
12 sail
Aloña Mendi kirol elkartearen barruan dauden 12 sailen artean antolatu dute aurtengo festa ere, eta tabernako eta sukaldeko txandak ere antolatuta dizute. Igeriketa saila izan zen lehen zerbitzatze lanak egiten eta futbola, saskibaloia, eskubaloia, txirrindularitza, pilota eta gehiagok jarraituko diote. Sail ezberdinetako kideek eta gurasoek enkargatuta dituzte, dagoeneko, bazkariak.
Karpa muntatzen ibili ziren atzo, eguaztena.
