Ekainak 23 da gaur, San Juan bezpera, eta aspaldiko ohiturari jarraituz, alde batera utzi gura diren traste eta gurari guztiak erreko dituzte herriko plazan. San Juan suaren, edo udarari ongietorria emateko festan, norberaren aukeran hori. Kontuak kontu, udako solstizioaren jaia edo San Juan sua egingo da gaur gauean Oñatin ere, Euskal Herriko beste hainbat herrietan bezala.
Aurtengo ekitaldia, baina, herriko ikastetxeek, gura elkarteek eta Udalak elkarlanean antolatu dute, lehenengo aldiz. "Henkuntza Mahaia osatzen dugunon artean antolatu dugu. Hiru talde ditugu mahai honetan: gurasoendako hitzaldi eta ikastaroak antolatzen dituena, Eskolabus proiektua lantzen ari dena eta euskara eta euskal kultura sustatzeko osatuta dagoena. Azken talde hori izan da, hain zuzen ere, San Juan sua antolatzeaz arduratu dena", azaldu du hezkuntza eta euskara teknikaria den Iñaki Akizuk.
Kantuak eta dantzak
Egitarauari dagokionez, berriz, ez dago aldaketa handirik. 19:00etan txorimalo eta buruhandiak ibiliko dira herriko kaleetan barrena, Jose de Azpiazu musika eskolako trikitilariekin batera. Kalejira ere egingo dute musikari horiek.
Sua bera 22:30ean piztuko dute Foruen plazan. "Herritarrek aukera izango dute traste zaharrak sutara botatzeko. 22:00etatik 22:30ak arte izango da hori", argitu du Akizuk. Behin sua piztuta, kantu herrikoiak abestuko dituzte. Lehen Hezkuntzako laugarren eta bosgarren mailako ikasleek emango diete hasiera, kioskora igota. Oñatz dantza taldeko kideek ere emanaldi berezia egingo dute. Aurten, gainera, aldaketak egin dituzte gaurko egunez egin ohi izan dituzten dantzetan.