Espazio berrian hasi da aurtengo Kalean egitasmoa

Musika eskolako haize taldeak eguaztenean egindako kontzertua
Jose de Azpiazu musika eskolako haize taldeak Lazarraga lorategian eguaztenean eman zuen kontzertuak eman dio hasiera aurtengo Kalean egitasmoari. Gaztelekuak antolatu ohi izan du orain arte. Aurten baina, Kultura sailak prestatu du egitaraua.

Udako kultura eskaintza kalera ateratzea du helburu Kalean egitasmoak. Baina berritasunak ere baditu aurtengo edizioak. "Espazio gehiagotara zabalduko dira ekitaldiak. Adibidez, Lazarraga lorategian, Bidaurretako eliza ondoan eta Eteon egingo dira antolatutako ekintzetako batzuk. Bestalde, gura genuen herriko taldeek ere presentzia handiagoa izatea egitarauan. Horrela, Ganbararen emanaldia, musika eskolako ikasleena, Eltzia egitasmoko eragileen edo Kantoikrit proba sartu ditugu, adibidez", adierazi du Nerea Zubiak, kultura zinegotziak. Eta gaineratu du: "Horrez gain, orain arte uztailean hasten zen, eta aurten ekainean hasiko da, aurreratu egin dugu".

Foruen plazan ere izango dira ekitaldiak eta musikaz gain, kale antzerkia eta zirko ikuskizuna ikusteko aukera ere egongo da. Bestalde, surf festa eta Kantoikrit kriteriuma ere biak daude Kalean egitasmoan, nahiz eta aurten egun banatan egin.

Egitarau osoa agendan dago.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.