Herriko hiru ikastetxeetako gurasoek koordinatuta antolatu dute aurten ere Eskola Kirola eta gurasoendako jolasekin ekingo diote ikasturte amaierako jaiari bihar, 10:00etan. Hala, urte guztian zehar laguntzen ibili diren gurasoekin jolasak egingo dituzte. Eta horren ondoren egingo dute sari banaketa. "12:00ak inguruan hasiko da, gurasoak dutxatu eta une hori antolatu eta gero. Udaberri txapelketako sariak ez ezik, neguko txapelketan kirol desberdinetan ibili direnek ere jasoko dute esker oneko saria", azaldu du Oskar Carrascalek, udaleko kirol teknikariak. Bide batez, guraso denei luzatu die gonbidapena jaira joateko.
Lehen Hezkuntzako hirugarren mailatik seigarren mailara arteko 300 ikaslek hartu dute parte aurten Eskola Kirolean. Urrian hasiko da ikasturte berria eta irailean zabalduko dute izenematea.