Aloñako Igoerak 10 urte beteko ditu aurten eta hiru egunetarako egitarau oparoa prestatu dute horren harira. Gaur jarriko dute martxan: arratsaldean zehar giroa berotzen lagunduko duten ekintzak izango dira eta ostean etorriko da lehen hitzordu garrantzitsua: gaueko kilometro bertikala. Bideoan, ibilbidea.
Euskal Herriko Txapelketa izango da proba, eta Koparako baliagarria ere bai. Horrek puntako atletak erakarri ditu probara, esaterako, Agusti Roc –Kilometro Bertikalean Munduko eta Europako txapelketak irabazitakoa–, Iñigo Lariz –Espainiako txapeldun iaz– eta Ionut Zinca –modalitate eta distantzia desberdinetan palmares ikusgarria duena.
Korrikalariek 2,7 kilometrotan 720 metroko desnibela gainditu beharko dute, Arantzazutik Buetraitzera arte. Sariak domekan, 13:30ean, banatuko dituzte Oñatiko Foruen Enparantzan.