Pasa berri den hiruhilekoan, 5,34 milioiko Ebitda lortu zuen Natrak, iazko epe berean baino %46,6 gutxiago, eta 2,34 milioiko emaitza garbi negatiboa; martxoa bukatutakoan, 0,18 milioi euroko irabaziak zituen.
Natrak esan duenez, aurreikuspenekin bat datoz emaitza horiek: "2013ko ekitaldian, kakaoa nabarmen garestitu zen, tonako 1.382 eta 1.800 libra arteko prezioekin, eta 2014ko lehenengo hiruhilekoan goranzko joera horretan jarraitu zuen, tonako 1.898 librako maximoa egin arte; 2011ko irail hasieratik ez ziren horrelako prezioak ikusten".
Europan, kontsumoa oraindik ahul
Mikel Beitiak zuzentzen duen enpresaren kakao eta txokolate negozioak 75,71 milioi euro lortu zituen salmentatan 2014ko lehenengo hiruhilekoan, iazko epe berean baino %1,6 gutxiago; izan ere, kontsumo dibisioak %3,9 gutxiago saldu zuen eta industria dibisioa %3,3 hazi zen. Natrak honela azaltzen ditu emaitzok: "Baldintza handiena Europan dagoen kontsumo-ahulezia da; hor egiten dira negozioaren salmenten %90,6. Natraren kakao eta txokolatearen negozio-zifra %2,2 jaitsi zen".
Erabakigarria izan zen ere kakao-hautsaren prezioaren gorabehera, Ameriketako merkatuari nabarmen eragin ziona (hori da Natraren kakao-hautsaren hartzaile handienetariko bat). Ameriketako kakao-hauts salmentak negozioaren %7,2 dira, eta %9,1 jaitsi ziren, nahiz eta kontsumo dibisioa hazi egin zen Ameriketan.
Asia Pazifikoan, 2013ko emaitzen bikoitza lortu da oraingo hiruhilekoan, baina merkatu horretan bakarrik kakao eta txokolate salmenten %2,2 egiten ditu Natrak oraindik.
