Bederatzi poeten lanak ditu bilduta, honakoak: Josep Carner, Carles Riba, J. V. Foix, Joan Salvat Papasseit, Pere Quart, Salvador Espriu, Joan Vinyoli, Gabriel Ferrater eta Vincent Andrés Estellés. "Bakoitzaren bederatzina poema ele bitan, jatorrizko katalanezkoa, eta euskarazko bertsioa daude. Poemak aukeratzerakoan, laburraren eta argitasunaren alde egin nuen, euskaraz testu gozagarria sortzeko aukera emango zuten poemen alde. Berba bitan, irakurlearen alde" azaldu du Markuletak eta zera gaineratu du: "XX. mendekoak dira guztiak, baina askotariko estilo eta gaien erakusleak: klasizistak eta abanguardistak, herriarekin eta kulturarekin konprometituak, berritzaileak...".
Antologia, poesia irakurle hasi-berriendako aproposa dela dio itzultzaileak: "Poesia zaila eta ulertezina dela burutik kentzeko egokia da oso. Batez ere, baina, katalan hizkuntza, literatura eta herria, maite dutenei gomendatuko nieke".