Esnekiak, karbohidratoak eta fruta edo zukua, gosari osasuntsu baten oinarri

Sarri behar beste kasu egiten ez diogun arren, askotan esan ohi da gosaria dela eguneko otordurik garrantzitsuena. Eta hain zuzen ere gosaria izan dute berbagai gaur goizean Oñatiko Elkar Hezi ikastetxeko hainbat ikaslek. Gosaria zergatik den garrantzitsua ikasi dute, eta baita gosariak, osasuntsua izateko, zer izan behar duen ere.

Oñatiko Elkar Hezi ikastetxean urtero egin ohi dute gosari osasungarriaren inguruko saio bat, eta aurtengoak gainera, harreman zuzena izan du Eskola Agenda 21 ekimenaren barruan lantzen ari diren gaiarekin; elikadurarekin, hain zuzen ere.

Gaur goizean egin duten ikastaroan, ikastetxeko jatorduak kudeatzen dituen Gasca enpresako Lide Elgezabal izan da gidaria eta gosari egokia zergatik den beharrezkoa azaldu die Lehen Hezkuntzako bosgarren mailako ikasleei. Dietistak esan duenez, gosari egoki baten ezin dira hiru elementu falta: esnekiak, karbohidratoak eta fruta edo zukua. Azalpenak entzun ostean, gosaldu ere egin dute ikasleek.

 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.