Herriko Gure Esku Dago lantaldeak antolatuta, erabakitzeko eskubidearen aldeko adierazpena sinatu dute eguerdian askotariko esparru eta kondiziotako ia 100 oñatiarrek. Herriko ordezkaritza zabala bildu nahian Gure Esku Dagok egindako deiari erantzunez, Euskal Herria nazioa dela, erabakitzeko eskubidea duela eta erabakitzea euskal herritarrei dagokiela adierazi dute Sancti Spiritus unibertsitatean bildutakoek.
Gaurko ekitaldira deituak izan ziren lagunek sinatutako Erabakitzeko eskubidearen aldeko Oñatiko adierazpena hala nahi duen herritar orok izango du aurrerantzean sinatzeko modua. Bestalde, ekainaren 8an Durango eta Iruñea artean egingo den erabakitzeko eskubidearen aldeko giza katerako izena emateko aukera ere egongo da hemendik aurrera –bi gauzotarako lehen aukera gaur bertan dute oñatiarrek, 19:00ak eta 21:00ak artean, plazan–.
