Kaleratzen duten bigarren diskoa da. Orain dela 10 urte argitaratu zuten lehena, X. urteurrenean: Sagatz. "Bigarren disko bat egiteko aukera irten zenean, asmoa izan zen 20 urte hauen laburpen txiki bat jasotzea", adierazi du Aitor Biain, Ganbara Abesbatzako zuzendariak.
'Amaraun'
Urteetan jositako amarauna da aurkezten dutena. Amarauna, lan gogorraren emaitza izan ohi da, buru-belarri egin beharrekoa, eta ordu asko eskatzen dituena. Eta, hain zuzen, horren erreflexu da diskoa."Amaraun izena eman diogu, poliki-poliki josi dugun lana delako", dio Biainek.
Hala, mimoz jositako Amarauna da eta mimoz aukeratu dute baita errepertorioa ere. 17 kantuz osatzen da diskoa eta mota askotariko abestiak dira: euskal folklorea, gospela, polifonia... Gehienak, a capellara abestuta, baina badira pianoz eta bateriaz lagundutakoak ere. Azken urteetan Ganbara Abesbatzarentzat garrantzitsuak izan diren esperientzien erakusgarri diren abestiak dira batu dituztenak, esaterako, Maribor-era joan zireneko obra bat edo Tolosako lehiaketan egon zireneko beste bat. "Oso disko polita gelditu da, ilusio handiarekin eginiko proiektua da".
Aurkezpen kontzertua
Urrian grabatu zuten diskoa Santa Ana antzokian eta Oñatiko San Migel parrokian. Orain, aurkezpen kontzertua egingo dute San Migel parrokian, domeka honetan, 19:00etan. Sarrera doakoa da. Kontzertu berezia izango dela esan digu Aitor Biain zuzendariak. Diskoko abestiak kantatuko dituzte eta baita Gran Premio Nacional lehiaketara eramango dituzten kantu batzuk ere.
Diskoa urtarrilaren 27tik aurrera egongo da salgai honako tokietan: Haritza, Izarraitz, Turismo Bulegoa, Arantzazuko denda, Sesiñena ile-apaindegia, Pake Lekuko taberna, Txokolateixian. Abesbatzaren webgunean ere izango da diskoa erosteko aukera.