Duela bi hilabete hasi ziren Oñatin Euskal Herriko Eskubide Sozialen Gutuna lantzen, eta hasierako aurkezpen baten ostean, lan horretan ibili dira azkenaldian hainbat eragiletako ordezkariak; hala nola ELA, ESK eta STEE-EILAS sindikatuetako kideak; mugimendu feministako ordezkariak; AHT gelditu plataformako eta Gaztetxeko kideak; eta baita zenbait norbanako ere.
Atzo iluntzean, talde horretako hainbat kide Oñatiko Foruen plazan izan ziren Gutun Sozialaren inguruko esku-orriak banatzen.
Girotze fasea
"Girotze fasea da hau, herritarrak informatzeko fasea" azaldu zuen ELAko Ane Romeok, eta gaineratu Gutun Sozialak hainbat gai ukitzen dituela: ekologia, emakumea, fiskalitatea, langabeak... "Gutun honekin gutxieneko batzuen zerrenda lortu gura da. Ezberdina egiten duena prozesua bera da. Helburua ez da eragile sozial batzuen ekarpena bakarrik jasotzea; kalean eztabaida sortzea baizik, jendeak bere sentitu dezala" adierazi zuen Romeok.
Hurrengo urratsa, herritarrak bildu eta euren ekarpenak jasotzea dela ere azaldu zuen.