Virginia Espin: "Gurasotasun kontzienteago baterantz egin beharko genuke"

Virginia Espin.
Hamabi orduko guraso coaching tailerra gidatuko du Oñatin eguenetik aurrera.

Gurasoen formazioaz arduratzeko Oñatiko ikastetxeek, guraso elkarteek eta Udalak osatutako lan-mahaiak tailer berezia antolatu dute. Seme-alaben potentziala eta talentua pizteko erremintak emango ditu Virginia Espin terapeuta eibartarrak.

Zer da guraso coaching-a?

Orain oso modan dagoen diziplina bat da, baina badira urte batzuk existitzen dela. Kirolarekin lotuta sortu zen, enpresa munduan ere asko egiten da orain, eta hezkuntzarako ere baliogarria da. Egia esan, aplikazio ezberdinak ditu, eta Diziplina bat da orain oso modan dagoena. Aplikazio ezberdinak ditu eta gehien entzuten dena da enpresetan edo erakundeetan egiten dena baina baditu beste aplikazio batzuk, esaterako kirolean, hezkuntzan, bikoteendako... Guraso coaching-a da teknika horiek gurasotasunera aplikatzea.
Coach-aren lana da pertsonen potentzial guztiak garatzen laguntzea. Bestela esanda, nola konektatu nire indarra eta nire potentzialak bizitzan zentzua ematen didanarekin. Abiapuntua, hemen, nork bere burua onartzea da. Pauso garrantzitsuena da norberaren garapenerako, eta ardatza da gure gaitasun naturalak identifikatzea gero potentziatzeko.

Gurasook baliabide berriak behar ditugu?

Coach baten ikuspegia garatzen badugu erreminta berriak lortuko ditugu. Erreminta berriak, batez ere, gure seme-alaben garapenerako espazio bultzatzaileagoak sortzeko. Guraso perfektuak ez dira existitzen eta ez dira sekula existitu. Hori da abiapuntua. Egiten dugu ahal duguna, eta nahiko ondo egiten dugula esango nuke, baina uste dut gurasotasun kontzienteago baterantz egin beharko genukeela. Guraso gara eta askotan ez gara kontziente edo ez gara ohartzen jokatzen dugun rolaren garrantziaz. Ze leku hartzen du gurasotasunak nire bizitzan? Nire seme-alaben garapenerako zer nolako espazioak sortzen ditut? Familia bakoitzak dauka izaera kolektibo bat; hori islatzen da arauetan, sinesmenetan, garatzen ditugun harremanen nolakotasunean, elkarrekin egoteko dugun eran, arduretan... Eta horrek guztiak sortzen du espazio mota bat. Seme-alabak espazio horretan garatzen dira. Batzuetan espazio oso bultzatzailea izaten da eta besteetan ez hainbeste. Espazio mugatzaileak ere sortzen dira. Kontziente bagara zelako espazioa sortzen dugun, zelako elkarrizketak izaten ditugun, zela definitzen ditugun gure seme-alabak eta nola begiratzen ditugun... Hor eragin dezakegu sortzen dugun espazio horren nolakotasunean. Kontzientzia hartuz espazio bultzatzaileagoa edo osasungarriagoa sortu dezakegu seme-alaben potentzialak eta talentuak piztu eta bultzatzeko. Zentzu horretan bai, baliabide berriak behar ditugu, eta lor daitezke.

Hamabi orduko tailerra duzue aurreikusita. Noiz eta non egingo dituzue?

Bidebarrieta kaleko erabilera anitzeko aretoan izango dira otsailaren 27ra bitarteko eguenetan, 18:15etik 20:15era. Saioak euskaraz izango dira, eta interesatuek udaletxean eman behar dute izena.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.