"Denok dugu Madrilen egiten dabiltzan makroepaiketen berri. 40 gazte eta hainbat herri elkarte epaitzen dabiltza. Gure herriko errealitatea, baina, ezezaguna da askorentzat. Oñatiko Arrano taberna ixteko arriskuan dago. Jendeak hori jakin dezan, beharrezkoa da horrelako egun bat egitea", adierazi digute Oñatiko Libre plataformatik.
Beraz, aldarrikapenerako eguna izango da biharkoa. Hona hemen antolatu duten egitaraua:
- 12:30: Triki-poteoa
- 14:30: Bertso bazkaria (txartelak Arranon salgai)
- 19:00: Manifestazioa. Ostean, kontzertuak Arranon.
Bertso bazkarian kantuan arituko diren bertsolariak izango dira Agin Laburu eta Unai Gaztelumendi. "Momentuz, 40 lagun inguruk eman dute izena bazkarirako. Oraindik bada lekua, ordea. Beraz, jendea animatu nahi dugu", gaineratu digute.
Manifestazioaren ostean, kontzertuak izango dira Arranon tabernan. Gela Berezia, Bene, Zuen Azkena, Txuletons eta Po(br)esiak taldeak arituko dira.
