Argiak piztu, eta eszenatokiaren alboetan, Ganbara Txikiren logo erraldoia eta denboraren makina zeuden. Denboraren makina horren laguntzarekin, Ganbara Txikikoen hamar urteetako errepasoa egin zuten; kantuez eta bideoz lagunduta.
Denboran bidaia
Esan bezala, kantuak eta bideoak tartekatu zituzten. Besteak beste, Ganbara Txikik Bartzelona, Sevilla edo Torreviejara egindako bidaiak; Torreviejan bertan irabazitako Habanera txapelketa edota ETB-ko Oh Happy Day saioan parte hartu zuteneko bideoak proiektatu zituzten pantaila erraldoi batean.
Kantuan ere ez ziren bakarrik ibili. Ondoan, Ganbara Abesbatzakoak, Ganbara Txikitxokoak, Tailerrekoak eta Ikastetxeak Kantarikoak izan zituzten.
Josu Elberdiren 'Hamar'
Amaiera ezin hobea eman zioten arratsaldeari, Elberdik urteurrenerako apropos egindako Hamar kantua interpretatuz eta beste hamar urterako indarrak batuz.