Oñatiko Udal liburutegiak gonbidatuta dator Joxean Agirre eguaztenean. "Oso pozik gaude, ez da erraza izaten bera horrelako ekitaldietara ekartzera eta", aitortu du herriko liburutegiko arduradun Arantzazu Ibarrondok. "Aukera gutxi izaten dira Joxean Agirrerekin egoteko, eta pentsatzen dugu herriko irakurleendako aukera ona izango dela bere azken lanaz galdetzeko eta bestelakoez ere berarekin berba egiteko", jarraitu du.
Fikziozko liburua da Adiskide bat nuen eta klandestinitatea da istorioaren ardatza. Elkar argitaletxearen eskutik argitaratu du eta nolakoa den azalduko du egileak berak eguaztenean, 18:30ean, Udal liburutegian.
Aurreko lana ere bai
Bestalde, Tertulixan taldekoek Agirreren Zwei frauen: bi emakume izeneko liburua irakurri berri dute, eta liburu horren gaineko solasaldia egiteko aukera ere izango dute idazle azpeitiarrarekin.