Lau emanaldi batuko ditu egitarauak; haurrentzako antolatu dute bihar, zapatukoa, eta publiko helduagorentzat, berriz, gainontzeko hirurak. Sarrerak aurrez erosteko aukera dago, barrabarra.eu atarian; helduentzako emanaldietarako txartelak sei eurotan eta hiru euro eta erdian, berriz, biharkoak.
Asteburuan bi ekitaldi
Opera divertimento taldearen Colas mago handia haurrentzako operak zabalduko du aurtengo edizioa; bihar, 17:00etan Santa Anan. Akto bakarreko 50 minututako ikuskizunean, Bastiana artzaina (sopranoa), haren maitalea Bastian (tenorea) eta Colas magoa (baritonoa) entzungo ditugu kantuan, agertokian beste bi aktore ere badira ere: Pepito, magoaren laguntzailea eta haren laguna.
Domekan, berriz, 19:30etan, Xabier Lizaso, piano-jolea eta Andoni Egaña bertsolaria igoko dira agertokira. Chopin pianista eta Xenpelar bertsolariaren antzekotasunean oinarrituta, musika, bertsoak, istorioak eta inprobisazioa uztartuko dituzte Bi arreba ikuskizunean.
Eta datozen asteburuetan santa Ana antzokian izango dira berriz, Emporako Ganbara orkestra (azaroak 17, 19:30) eta Musica Boscareccia (azaroak 24, 19:30).