Aurtengo nobedadea da zaleen ikuspuntua gehituko dela, eta Lourdes Ugartek gaur egun perretxikoek pizten duten zaletasunaz hitz egingo du, 18:00etan Gandiaga Topagunean. Emakumezko zaleen ikuspuntua ere jorratuko du, hain ohikoa ez dena.
Pintxoak eurak inguruko sukaldariek egindakoak izango dira: Zelai-Zabal, Arantzazuko Santutegiko Hotela, Sindika eta Goiko-Bentako sukaldariek, hain zuzen ere. Egileek eurek aurkeztuko dituzte aurtengo miko-pintxoak hitzaldia eta gero. Azkenik, 19:00etan, pintxoak dastatzeko aukera etorriko da, esandako jatetxeetan pintxo-poteo zirkuitua eginez. Pintxoa eta edaria euro eta erdian salduko dituzte.
Bertako kulturaren adierazle
Arantzazuko Adiskideek Arantzazu ezagutarazteko ekintza gisa antolatu zuten lehenengo miko-poteoa, orain dela hiru urte. Izan ere, "udazkena sasoi berezia da bisitari asko bertaratzen direlako inguruotako perretxikoak batzera", eta publiko horri eskainitako ekintza da miko-poteoa.
Ekintza horrek bi ikuspegi ditu, hortaz: bata ludikoa eta bestea kulturala. "Alderdi ludikoa mikopotean garatuko da; alderdi kulturala eguna aberasteko garatzen da. Mikopoteorako, bertako jatetxe eta tabernek dastatuko diren mikopintxoen elaborazio zaindua egin dute, bertako kultura gastronomikoaren adierazle", esaten dute Arantzazuko Adiskideek.
Aurreko bi mikopoteo egunetan 40 bat lagun batu izan dira, adin guztietako zaleak, eta aurten ere, gutxienez beste hainbeste erakartzea espero dute.