Uztailean esleitu zitzaion Kataluniako Intra enpresari plana egitea. Lana ez da hutsetik abiatzen, herrian aurretik beste plangintza batzuk eginak daude-eta: irisgarritasun plana, bizikleta plana edota energia iraunkorraren inguruko ekintza plana, besteak beste. Intra enpresa orain arteko dokumentuak batu eta mugikortasunaren oinarrizko diagnostikoa egiteko datu bilketa egiten dihardu.
Lehen fase honetan, kale inkestak eta hainbat faktoreen inguruko neurketak egingo dira. Hau da, egungo egoeraren argazkia osatuko da. Horretarako, Intrako teknikariak joan den astean hasi ziren kale galdeketak egiten. Asteon ere jarraituko dute galdeketokin.
Udalak herritarren kolaborazioa eskatzen du eta horregatik inkesta horiek betetzeko aukera ere badago Udalaren webgunean –www.oinati.eu–.
Mugikortasun Foroa
Herritarren ekarpena ez da galdeketa horietara mugatuko. Mugikortasunaren egoera hobetu gura dute: "Herritarrendako Oñati bat nahi dugu, autoak ez dezala lehentasun izan. Herri barruan autoa erabiltzeko ohitura alboratu behar dugu", uste du Egañak. Proposamen zehatzak eztabaidatzeko Mugikortasun Foroa sortuko da azaroan, eta hor ere herritarren parte-hartzea eskatzen dute. Hiru edo lau bilera egingo dituzte; parte hartu gura duenak udaletxeko telefonora deitu beharko du (943 78 04 11).
Mugikortasun planaren barruan hainbat aldagai kontuan hartu behar direla aurreratu du Oñatiko Udalak: oinezkoak, bizikletak eta bidegorriak, garraio publikoa, auto pribatuak eta aparkalekuak... Plana urte bukaerarako amaitzea espero dute.
Aldundia ere, lan horretan
Gipuzkoako Foru Aldundiak herri arteko autobus zerbitzua hobetzeko parte hartze prozesua abiatu zuen orain gutxi eta Oñatin urriaren 15ean egin zuten geldialdia. Oñatin, autobus urbanorik ez dagoenez, Lurraldebusek zerbitzu berezia eskaintzen du. Garraio publikoa erabiltzen duten guztiei eta interesa duten herritarrei zuzenduta dago ekimena. Bilerez gain, Internet bidez ere egin daiteke ekarpena. Galdetegi bat bete daiteke 'www.garraioahobetzen.net' webgunean.