Espainiako bandera jarri beharko da Oñatiko udaletxeko fatxadan eta areto nagusian. Euskal Autonomia Erkidegoko auzitegi nagusiko administrazioarekiko auzi salak eman du azken epaia, ia bi urte maila ezberdinetako epaitegietan errekurtsoak jarri eta gaia berraztertzen ibili ostean. Hala, egunero eta modu iraunkorrean jarri beharko da Espainiako bandera udaletxeko fatxadan eta areto nagusian. Sententzia honek auziaren bide administratiboa agortzen du. Beraz, epaia beteko ez balitz, gaia, auzibide penalean sartuko litzateke. Sententziak, bestalde, agindua betetzeko ardura udaleko zein organok hartuko duen zehaztea eskatzen da. Atzoko osoko bilkuran, udalbatza bera izendatu zuten organo betearazle. Hau da, udalbatzak hartzen du bandera udaletxean jartzeko ardura. Dena dela, hurrengo asteetan herriko eragile ezberdinekin jarriko da harremanetan Udala sententziari erantzuteko bidea aurkitzeko. Udaletik egiten duten irakurketaren arabera, atzotik bi hilabete izango dituzte bandera jartzeko. Bildu eta EAJ bat etorri ziren erabaki inposatzailea dela esaterako orduan.
Bestalde, bi mozio aurkeztu zituzten atzoko osoko bilkuran. Batetik, joan zen astean Venezuelan atxilotu zuten Asier Guridi Zaloñaren aldeko mozioa; aho batez onartu zuten bi alderdiek. Mozioan, besteak beste, elkartasuna adierazten zaie senide eta lagunei, eta Nazioarteko eta Venezuelako Gobernuei egungo egoeraren barruan jarduteko eskaera ere jasotzen da.
Bestetik, Lomceren aurkako mozioa ere aurkeztu zuten. Kasu honetan ere erabatekoa izan zen adostasuna.