2011ko abuztuan, Espainiako Gobernu ordezkariak eginiko errekerimendua jaso zen udaletxean. Hor zehazten zen udaletxeko fatxadan eta barrualdean preferentziazko toki batean jarri beharko zela Espainiako bandera.
Gaia auzi bidean sartu zen, Estatuko Abokatuak auzi-helegitea jarri zion-eta Udalari. Hala, ia bi urte joan dira maila ezberdinetako epaitegietan errekurtsoak jarri eta gaia berraztertzen. Azkena, Euskal Autonomia Erkidegoko auzitegi nagusiko administrazioarekiko auzi salaren sententzia izan da. Horren arabera, Espainiako bandera udaletxeko fatxadan eta areto nagusian jarri beharko da.
Biharko Osoko Bilkuran izendatuko dute gai honetako organo betearazlea nor izango den, hau da, nor izango den arduraduna. Behin hori erabakitzean, bandera jartzeko bi hilabeteko epea izango dutela interpretatzen dute Udaletik. Bestalde, gaiaren jarraipena egiteko lan talde bat eratu dute.