21 urteren ondoren, Iparraldeko bikote batek irabazi du aurtengo Oñatiko nazioarteko artzain txakurren txapelketa. 12 parte-hartzaile aritu ziren atzokoan –domeka–, guztiak ere maila txukuna erakutsiz, baina irabazleak, Jean Paul Irikin eta 'Xintxo' izan ziren. Bigarrenarekiko aldea, baina, ez zen horren nabarmena izan. Hain zuzen ere, Antonio Alustiza eta 'Bat', lau puntura gelditu ziren. Alustizak, 2010, 2011 eta 2012ko txapelketak irabazi zituen. Orduko haietan, 'Ttiki' txakurrarekin. Aurten, baina, ezin 'Ttiki'rekin etorri, abuztuan hil baita.
Lehenengo ariketan alde nabarmenarekin zeuden lehenengo postuan Irikin eta Xintxo; 14 puntu ateratzen zizkieten Alustiza eta haren txakur Bati. Bigarren ariketa, baina, ardiak eskortan sartzekoa, bikain egin zuten Alustizak eta Batek eta lehenengoaren eta bigarrenaren aldea nabarmen gutxitzea lortu zuten. Azkenean, 437 punturekin, Iparraldeko Jean Paul Irikin eta Xintxo gelditu ziren lehenengo. 433rekin, Antonio Alustiza eta Bat.
Jean Paul Irikin pozik agertu zen, Iparraldeko bikote batek azkenengoz irabazi zuela 21 urte pasatu diren honetan. Txapela, besarkada batekin, Fermin Mihuriri eskaini gura izan zion. Hura da Iparraldeko artzain txakur txapelketen antolatzailea eta gaixo dago. Lehen baino lehen, berriz ere bueltan egoteko animoak bialdu zizkion Irikinek Oñatitik.
ALBISTEAK ESKUKO TELEFONOAN
Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!
WHATSAPP: Bidali ALTA 688 69 00 07 telefono zenbakira –Whatsapp bidez–.
TELEGRAM: Batu zaitez @GoienaAlbisteak kanalera.
ASTEBURUETAKO BULETINA
Zure posta elektronikoan asteburuko albiste nabarmenekin osatutako mezua jasoko duzu. Harpidetu zaitez debalde hemen.
Harpidetza aukera guztiak
