22:30ean hasiko duen emanaldia ordubete pasakoa izango dela aurreratu du kantautore oñatiarrak, eta bereziki azken diskoko (Hodeien azpian, 2011koa) kantuak interpretatuko dituela, nahiz eta era berean, ateak zabalik laga dituen berezitasun edo sorpresendako: "Gaurko kontzertua lotzen dugu azken diskoarekin, Oñatin eta inguruetan ez garelako ibili hori jotzen. Baina osatuko dugu asko sasoi ezberdinetako kantuekin". Izan ere, Ruper Ordorikak esandako moduan, badira hiru urte Oñatin egon ez dela.
Ondo pasatzea helburu
Eta hain justu, horrek berorrek (kontzertua Oñatin izateak) izango du eraginik gaurko emanaldian: "Hiru urtean behin Oñatira etortzea ederra da, eta horri begira gatoz gehiago, birari begira baino", aitortu du musikariak. "Beti jartzen dugu burua ondo pasatze aldera, eta ahal bezain ondo egitera gure partea jendeak ere ondo pasa dezan. Baina aspaldiko esana da inor ez dela profeta bere herrian… dena den, aspaldiko gauza da, baita ere, jendeak normaltasunez hartzen nauela, zorionez, eta ondo pasatzen dugu. Bestalde, noan tokira noala, gustuko izaten dut behintzat kantuen arteko berbak, lotura ezberdinak tokian tokiko ezaugarriak kontuan hartuta egitea, eta Oñatin zeresanik ez. Bestalde, horrez gainera, litekeena da kantu bereziren bat ere egitea… sorpresa moduan utziko dugu".