Txapelketan ez dago berrikuntzarik. "Egia esan, urtetik urtera daukagun berrikuntza parte-hartzaileak dira. Eta horietako asko urtez urte errepikatzen dira", esan digu Jose Mari Bengoa antolatzaileak.
Txakurrek bi froga egin beharko dituzte. Lehenengoan artzainaren aginduei kasu eginez, artaldea hartu eta zelaiaren erdian dagoen hesitik pasa beharko da. Ondoren zelai barrenean dagoen makila baten ondora eramango du artaldea, eta bukatzeko epaimahaiak adierazitako hesitik pasa beharko da: eskuinetik edo ezkerretik.
Bigarren ariketan, banderatxoekin egindako bidetik joan, artaldea hartu eta erdian dagoen eskortan sartu beharko du. Ariketa bukatzeko, ardiak eskortatik atera beharko ditu.
Nazioarteko artzain-txakur txapelketak bi sarrera ditu: Berezaotik eta San Martinekin. Azken horretan, umeen gozamenerako pottokak egongo dira. Sarrerak hiru euro balio du.