Gotzon Osinagak, Koldo Guridik, Isabel Atxak, Joxe Mari Zugastik eta Iker Loitik azaldu dute dokumentalean euren atxiloaldian bizi izan zutena: kolpeak eta gehiegikeria fisikoak zein psikologikoak. Euren oroitzapenak ez ezik, senideek nola bizi izan zuten ere agertzen da dokumentalean.
Julen Arzuagak Giza Eskubideen Euskal Herriko Behatokiaren izenean hartzen du parte ikus-entzunezkoan eta torturaren arrazoiak azaltzen saiatzen da. Jaiki Hadi medikuen erakundeko Oihana Barriosek, berriz, torturatzaileen izaera aztertzen du, besteak beste.
Oñatiko Euskal Memoria taldearen proiektua
Barruko arrastuak dokumentalak Oñatiko Euskal Memoria taldeak egindako frankismotik gaur egunera arteko atxilotuen zerrenda du oinarri. Horren arabera, epe horretan 168 pertsona atxilotu zituzten Oñatin eta horietako 59k torturak salatu zituzten.
Proiektua, beraz, memoria historikoa berreskuratzea helburu duen Oñatiko Euskal Memoriak egina da. Ekoizpena, berriz, Irudiz komunikazio taldearena da.