Frantziskotar artistaren omenezko txapelketan hiru kategoria egongo dira: haurrena (11 urte artekoak), gazteena (12 eta 16 urte artekoak) eta helduena (16 urtetik gorakoak).
Parte-hartzaileek txokoak, paisaiak edo Arantzazuko santutegi inguruko monumentuak margotzeko aukera izango dute. Hori bai, bakoitzak margolan bat bakarrik aurkeztu ahal izango du, teknika librea erabilita.
Txapelketarako izen-ematea Gandiaga Topaguneko kulturgunean izango da, 10:00etatik 12:00etara. Eta margolanak, berriz, 17:00etarako bukatuta izan beharko dituzte parte-hartzaileek.
Jardunaldiak hasteko, mahai-ingurua egingo dute Alvarez de Eulateren eta bere lanen gainean. Horretarako, Edorta Kortadi, Miguel Angel Alonso, Iñaki Urrizelki eta Juan Mari Martinez de Ilarduia izango dira hizlari.
Sari bikainak
Sariei dagokienez, helduen kategorian hiru banatuko dituzte: lehenengo saria 1.500 euro izango da; bigarren saria, 750 euro eta diploma; eta hirugarrena, 400 euro eta diploma. Eta gazteen eta haurren kategorietako irabazleek, berriz, margotzeko material sorta bana jasoko dute.