Imajinatu hotelez, jatetxez, merkataritza-gunez eta adreiluz betetako leku bat. Eta ondoren, jarri erdi-erdian oasi berde bat, ura protagonista duen oasia. Horixe da Tenerifen, Playa de las Americas delako gunean dagoen Siam Parken itxura. Uretako jolas-parkea da, antzinako Tailandia oinarri hartzen duena, eta handi zein txikiendako dibertsiorako aukera aparta eskaintzen duena. Bertan sartu aurretik, aholku bakar bat, ilaretan pazientzia. Baita gehiago ordaintzeagatik Fast Pass txartela dutela eta itxaron gabe zure mutur aurretik igarotzen direnekin ere. Horrelakoetan ere, mailak eta mailak daude…
Orduan eta arriskutsuago, hobe
Atzean geratu dira uretako jolas-parkeak txirrista luzez eta flotagailuz betetako errekastoz osatutako parkeak bakarrik zireneko garaiak. Egun, badirudi ez dagoela mugarik, eta ideiak, zoroenak izanda ere, egia bihurtu daitezkeela. Dena zirrararen mesedetan, adrenalinaren izenean, denok ere hain gustuko dugun beldur zirraragarria lortu guran. Siam Parken hor dago Dragon izeneko atrakzioa: txirrista erraldoia, bertikalean jarritako paellera handiekin osatua. Edo Snake Jungle: lau txirrista ezberdin, bakoitza bere ibilbide eta sekretuekin, banaka zein binaka botatzeko.
Denen artean deigarriena baina, Tower of Power da: 26 metroko jauzia duen txirrista, tiburoiak ere badituen akuarioa azpitik zeharkatzen duena. Akuarioa baina, kanpotik ikustea hobe: ez da erreza begiak irekita eta burua argi mantentzea ziztu bizian goitik behera zoazenean! Ordubete pasatxoko ilararen ostean, bost segundo eskaseko sentsazioa. Merezi duen? Bai horixe, baita errepikatzea ere!
Txikienen pare
Atrakzio sinpleagoak eta lasaiagoak ere badaude, etxeko txikienendako. Baina sentsazioa dut, gora eta behera, uretan sartu eta irten, aspaldi koskortutako neskatila-mutikoak ginela gehien gozatzen ari ginenak. Ikusi besterik ez zeuden ingurukoen aurpegiak, algarak, oihuak. Eta azken orduko zurrunbiloa. Parkeak ateak itxi aurreko ordubetean, jende gutxiago zegoela-eta, denak batetik bestera korrika, hainbeste gustatu zitzaigun horretan beste behin, edo beste bitan ibili guran. Eguneroko zurruntasunak alde batera utzita, berriz ere aske, berriz ere "umekeriak" egiten, ondo pasatzea bakarrik buruan.
Zazpi orduko dibertsioaren ostean, gero etorri ziren nekeak, gihar-minak eta sofatik ezin altxatuak. Eta handik gutxira, baita berriz itzultzeko gogoa ere…
