Gustatzen zaigu aurrez bidaia prestatzea, interesgarriak izan daitezkeen lekuak etxetik bilatzea; bidaiaren parte bat da hori ere. Aurten azkeneko asterarte, ezer gutxi begiratua geneukan arren, dagoeneko apunte pila bat batu ditugu, Arrasateko Gazte-bulegoko Dorletak emandako foiletoak direla edo sarean aurkitutakoak. Bidaiaren bizkar-hezurra markatu dugu horrela baina edozein momentutan moldagarria izateko modukoa. Etxean egindako zerrendan ditugu Piedrafita de Jacako "Lacuniacha" parkea eta Larreseko antzerki eta musika jaialdia; horregatik, bada, lehenengo etapa, Sabiñanigo (Huesca) inguruan egiteko asmoa dugu. Han ikusi edo lortutako informazioaz hurrengo etapa zehaztuko dugu gero.
Gehienetan kanpinetan
Kanpinetara joateko ohitura dugu baina tokian tokiko akanpaleku guztiak dira balekoak. Badago horiek aurkitzeko orri aproposa; www.furgopefecto.com da helbidea. Kokapena, ezaugarri eta baliabideei buruzko informazioaz gainera, erabiltzaileen iritzi baliagarriez osatutakoa.
Oporrak lagunak bisitatzeko garaia izaten da, nahiz eta askotan ez den samurra gure lagunentzako ere, opor garaia izaten da-eta. Bartzelonan ditugu Oñatiko kuadrilakoak bizitzen, baina Oñatira etorriko dira horiek data beretsuetan. Hala ere, saiatuko gara, bidean bada ere elkartzen. Ez zaigu komeni, bada, aurrez esan moduan, bidaia oso lotuta eramatea.
Eta bagoaz! Atzean utzi dugu Oñati eta Eskoriatzara goaz, familia agurtu eta aurtengo abenturarekin hasteko. Gaurko gaua Iratxen (Nafarroa) egingo dugu, biharkoa auskalo! Ondo pasa zuek ere eta bueltararte, ondo izan eta gozatu! Guk ere egingo ditugu-eta ahaleginak!