Abuztuko azken bi egunetan egingo dute Oñatiko aurtengo Surf festa eta egitarau mardula antolatu dute.
Abuztuaren 30ean, esaterako, surfeko tablak egiten dituen Peta Barrel etorriko da Oñatira. "Surfeko taulen erakusketa bat egingo du herriko kaleetan zehar. Hurrengo egunean, abuztuaren 31n, taulak nola egiten diren azalduko du kale Zaharreko plazatxoan", azaldu du Aitor Perosterenak, festaren antolatzaileetako batek. "Toki horretan bertan, skate-an egiteko patineteak egiten dituzten gazte batzuk etorriko dira Lekeitiotik, eta kalean zirkuitu txiki bat ere prestatuko dugu umeek, gazteek zein nagusiek patinetean ibiltzeko", gaineratu du Perosterenak.
Sardina jana ere egongo da aurten, eta baita Surf Fixed bizikleta karrera ere, bigarren aldiz. Hori antolatzeko, baina, laguntza behar dute, bidegurutzetan egoteko, adibidez. Laguntzeko prest dagoena antolatzaileekin harremanetan jar daiteke.
DJak tabernetan
Zinema eta musika ere uztartuko dira aurtengo Surf festan. Horrela, festako lehen egunean, kontzertua egongo da Atzeko kalean. Emanaldia hasi aurretik, surfari buruzko laburmetraia bat emango dute hantxe bertan, eta baita beste filma bat ere kontzertuko tarte baten. Zapatu gauean, abuztuak 31, berriz, Javi P3Z DJa etorriko da Oñatira. Musika emanaldia egingo du kale Zaharreko plazatxoan. Gauean izango da hori. Aldi berean, beste DJ batek Luisena tabernan jarriko du musika, eta beste hiruk, batera, Pako tabernan.
Salto txapelketa Usakon
Bestalde, aurten ere egingo dute Usakoko salto txapelketa. Abuztuaren 31n izango da. 10:00etan hasiko da. Sari banaketa, berriz, iluntzean egingo dute Ona tabernaren aurrealdean.