Uda garaia heldu dela eta, gero eta ohikoagoa da Oñatin turistak ikustea eta Oñatiko Turismo eta Garapen Agentzian aukera zabala dute prestatuta datozen bisitariak hartzeko. Turismo bulegoa egunero dago zabalik, eta herri barruan bi bisita gidatu egingo dituzte egunean astelehenetik zapatura, 12:30ean eta 17:00etan. Domekan, goizez izango dira bisitok. Sancti Spiritus unibertsitatea eta San Miguel parrokia dira bisita gidatuen ardatzak.
Arrikrutzeko kobari dagokienez, astelehenean ezik gainerako egun guztietan bisitatu ahalko da, eta abuztuko bi egunetan espeleoabentua saioak egingo dituzte: 17an eta 21ean. Azken hau gainera, familia osoarendako saioa izango da. Espeleoabenturan parte hartzeko aurretik izena eman behar da, eta komeni da gauza bera egitea bisita gidatuekin ere.
Aizkorri-Aratz mapa berria
Turismora begira, bestelako ekintzak ere prestatu dituzte. Hala, herriko hainbat jatetxe Debagoieneko Jardunaldi Gastronomikoetan ari dira parte hartzen eta herrian argitaratzen den Bomag aldizkarian ere turistei begira informazio zabala dago euskaraz, gazteleraz eta ingelesez ere. Honetaz guztiaz gainera, Aizkorri-Aratz parke naturalean egin daitzkeen ibilbideekin mapa berri bat kaleratu dute.
Ikerne Altuberen esanetan, aurreko hilabeteetan turismo bulegotik pasa den bisitari talde kopurua handitu den arren, bakarka eta talde txikitan egon direnak gutxiago izan dira. Arrikrutzen bestalde, apur bat igo egin da bisitari kopurua. Datozen asteetara begira gainera, baikor daude.
