Herrira taldeak antolatuta, 197/2006 doktrinaren inguruan herritarrek uste dutena jasoko dute gaur, egubakoitza. 19:30ean izango da, Kalegoienan.
Estrasburgoko Giza Eskubideen Epaitegiak aurki erabakiko du Ines del Rio tafallarrak espetxean jarraitu beharko duen edo ez. Gaia jendartean presente egoteko asmoarekin, Herrira elkarteak doktrinaren aurkakotasuna jasoko du Herritarren Epaia ekimenarekin. Elkartekoen esanetan, saiatuko dira ezezkoa "ahalik eta anitzena" izaten; jendeaz gain herriko taldeek parte hartzea da euren asmoa. Herrirako Mikel Kortabarriaren arabera, Estrasburgok dioenak 70 bat euskal presori eragingo die, tartean Xabin Usandizaga herritarrari.