Duela astebete ekin zioten arte-udalekuei Oñatin, eta beste bi astez artearen inguruan lanean ibiliko dira. Parte hartzen duten gaztetxoak, goizero 10etan elkartzen dira gaztelekuko sotoan eta begiraleek lagunduta, sormen lanean aritzen dira eguerdira arte.Iaz lehenengo saiakera egin ondoren, aurtengo arte-udalekuak indartsuago hasi dira; denera 11 gaztetxo dabiltza artearen munduan buru belarri murgilduta.
Hiru orduko saio hauetan, marrazkiak, pintura, eskultura edo argazkilaritza lantzeko aukera izango dute. Hala ere, Amaia Martinez de Arenaza begiraleak adierazi duen bezala, gaztetxoen erritmo eta motibaziora moldatuko dira ekintzak. Arduradunek, musika jarri, egitekoak proposatu eta baliabideak ematen dizkiete, eta parte hartzen dutenek erabakitzen dute momentu oro zer eta mola egin. Hasieran beldur puntu bat izan arren, oraingoz erantzuna oso ona izan da.
Gaztelekuko sotoko ekinaldiez gain baina, irteerak ere egin dituzte dagoeneko, besteak beste kultur-etxera eta Guggenheim museora.