Segurtasun Sailaren arabera, atzo goizaldeko hiru t'erdietan, hainbat ertzain ohartu ziren turismo bateko gidariak kristalezko baso bat zuela eskuetan, eta handik edaten eta modu bitxian gidatzen ari zela. Ibilgailuak ia-ia istripua izan zuen Portu kalean sartzeko garaian, eta azkenean bertan geratu eta ezkutatzeko ahalegina egin zuen, ertzainek ikus ez zezaten.
Ertzainen "gainera salto egin"
Poliziak emandako xehetasunen arabera, agenteek identifikatzeko eskatu zioten gizonezkoari behin eta berriz, baina atxilotuak ezezkoa eman zien harro eta modu erasokorrean. Halako batean, beren gainera salto egin zuen eta ostikoka eta muturrekoka hasi zitzaien ertzainei; azkenean lortu zuten gizonezkoa geratzea, eta atxilotu egin zuten. Atxilotzen parte hartu zuten ertzainetatik hiruk asistentzia medikoa behar izan zuten jasotako erasoagatik.
Desobedientzia eta erresistentzia, besteak beste
Segurtasun Sailak aditzera eman duenez, atxilotutako pertsona 28 urteko gaztea da, eta aurrekari dezente ditu. Ertzainen kontrako desobedientzia eta erresistentzia delituak leporatu dizkiote, baita bide-segurtasunaren kontrako atentatua ere, alkoholemia-proban positibo eman zuen-eta.