Kontzertuan ospatuko du Drakesek gaur 10. urteurrena punk talde gehiagorekin

Gaztelekuak lau talderen kontzertua hartuko du gaur. Drakes oñatiarrek, Basura eta Odio oreretarrek eta Sutura trintxerpearrek bertan joko dute, 22:00etan hasita. Ez da nolanahiko kontzertua izango, ia guztiek dutelako urteurrenen bat gogoratzeko.

Hamar urte pasa dira gaztetxoz osatutako Drakes taldeak lehen kontzertua eman zuenetik. Gaztelekuan izan zen emanaldi hura, eta, ordutik hona kontzertu pila bat eman badituzte ere, oholtza gainera lehen aldiz igo ziren lekura bueltatuko dira 10. urteurrena ospatzera.
Kontzertua grabatzeko asmoa du talde oñatiarrak, zuzeneko diskoa kaleratzeko gero.


Punk kontzertu mitikoa

1983ko apirilaren 16an punk kontzertua izan zen Oñatiko plazako pilotalekuan. Cicatriz en la Matriz, RIP, Vulpess, Odio, Basura, Cirrosis, Desorden eta Ultimo Resorte taldeek jo zuten orduko hartan, eta zenbait oñatiarrek gogoan du oraindik.
Orduan bizi izandakoa oroitzeko aukera izango dute talde haietatik bizirik dirauten Odio eta Basura taldeekin. Berrikuntzak izan dituzte biek, kide berriekin indarberritu dira, baina aldarrikapen mezuak zabaltzen jarraitzen dute.
Sutura taldea, berriz, bere 15 urteko ibilbidea jasotzen duen 15 años diskoa aurkeztera dator Oñatiko Gaztelekura.

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.