Oñatiko saskibaloiaren historian beste pauso bat ematera

Asteburu hau da Oñatiko saskibaloiarendako inoizko garrantzitsuena. Esaldi potoloa da, seguruenik, baina sinisteko zaila bada ere, oñatiarrak maila probintzialeko talde bat izatetik, urte gutxitan, LEB mailara igotzeko borroka egitera pasa dira. Eta hain zuzen, helburu hori lortzeko borrokatuko dira gaur hasi eta domekara arte, Plasencian. Atzo –eguena– arratsaldean hartu zuten harako bidea: jokalariak eta euren senitartekoak pozik eta ilusioz gainezka joan ziren. 'Ametsak darrai, aupa Aloña!' esanda, agurtu gintuzten.

Gaur –egubakoitza– (18:00) Estudiantes izango dute aurrean: "Ilusio berezia egiten dit euren kontra jokatzeak, talde horretako zale naizelako", diosku Eneko Blancok, baina txarto datorkie fasea euren kontra hastea: "Joko erabat ezberdina dugu, talde gaztea da, azkarra, bat-bateko oso ona duena". Partidu hori ez da erabakigarria izango, baina dezente baldintzatuko du fasea, eta ezingo lukete beste akatsik izan. "Zapatuan kataluniarrak izango ditugu aurrean, Hospitaletekoak, eta horiek bai, gure antzeko taldea dute. Esperientziaduna, joko motelagoaz. Baina, barne jokoan oso jokalari onak dituzte, eta gure barne jokoari dagokionez, albiste txarrak izan genituen joan den astean [De la Iglesiaren eta Cavadaren lesioekin]".

Eta, Plasenciaren kontra jokatuko dute domekan: "Ea zelan iristen garen bi taldeak partidu horretara. Berez gu izan gaitezke faborito, baina ligako azken partiduan 800 ikusle izan zituzten animatzen, eta fasean aurreikusten da 1.000 izango dituztela".

 

Jarraipen zabala gurean 

Igoera fasea urrun jokatuko badute ere, asteburuan jarraipen zabala egingo zaio Natra Oñatiren igoera faseari. Atari honetan, faseko partidu bakoitzaren informazio eguneratua izango duzue, eta Goiena paperak astelehenean bi orrikoa jasotzeaz batera, Harmailatik saioan (22:00) izango ditugu Iagoba Gamarra, Eneko Blanco eta Gorka Judez. Gainera, taldeko prentsa arduradun Aratz Losada Goienarekin kolaboratzen izango da Plasencian; hala, igoera fasea barru-barrutik bizi ahal izango dugu astelehenean bertan.

Losadak berak ere jarraipen zabala egingo dio faseari bere webgunean (www.ok-magazinea.com), eta gaur bertan zortzi orriko gehigarria zintzilikatuko du sarean, faseari buruz jakin beharreko guztiaz. 

ALBISTEAK MUGIKORREAN

Debagoieneko albiste nabarmenenak eta azken ordukoak Whatsapp edo Telegram bidez jaso gura dituzu? Harpidetu zaitez doan!

WHATSAPP: Bidali ALTA 688 69 00 07 telefono zenbakira –Whatsapp bidez–.

TELEGRAM: Batu zaitez @GoienaAlbisteak kanalera.