San Juan kalearen barrenetik gora aldatu diren ur hodi berriak sarearekin lotzeko lanak dira egiten dabiltzanak. Lanok bizpahiru egunez egingo dituzte, eta ondorioz, errail mozketak ere, eguazten iluntzerara arte iraungo du.
Zirkulazioa nondik nora
Bidebarrietatik San Juan kale aldera doazen ibilgailuek biribilgunean buelta hartu eta Bidebarrietatik irten beharko dute. Salbuespen modura, Ikastolako autobusari pasatzen lagako diote. Arrazoia da autobusaren tamaina handiak eragotzi egiten diola biribilgunean buelta hartu ahal izatea, eta horretxegatik, libre dagoen errailetik bideratuko dute.
Ur hoditeria aldatu eta beharrezko lotuneak egin eta gero, zuloa hareaz bete eta txapaz estaliko dute; horren ostean atzera ere zabalduko dute erraila zirkulaziora.
Irisgarritasun obrak, datorren astean
Bestalde, ur hoditeria berritzeko lanen ondoren, San Juan kalea irisgarritasun neurrietara egokitzeko lanak egingo dira. Datorren astean hasiko dituztela espero dute. Izan ere, irisgarritasuna bermatzeko obrak hasi aurretik, orain jartzen ari diren ur hodiak ondo daudela ziurtatzeko probak egin beharko dituzte.