Harridura keinuz lagundutako agurrak, garai bateko kontuen gaineko solasak eta etorkizunean elkarren berri sarriago izaten ahalegintzeko promesak. Osagai horiek izan zituen Arantzazu Eguneko aurtengo ospakizunak, aurrez egitarauan zehaztuta zetozenekin batera.
Izango dira 1.000 inguru Arantzazuko seminarioan ikasten ibili eta oraindik bizi diren lagunak, eta horietatik 150 bat izan ziren domekan –denengana iristeko zailtasunak aitortu zituen Iñaki Beristain frantziskotarrak, datu faltagatik–.
Mahai-ingurua egin zuten aurrena eta garai desberdinetako ikasle ohiek han jasotakoa azaldu zuten: "Ikasi zutela ikasten" izan zen askok nabarmendutakoa. Meza egin zuten ondoren; hainbatek tragoxka bat hartzeko edo inguruko bazterretan berriz ibiltzeko aprobetxatu zuten tarte hori, eta elizakoak amaitzean Andoni Egaña eta Sebastian Lizasok bertsotan egin zuten, eta Jon Enbeitak kantuan, gitarrarekin. Egiten zuen giro ederrarekin, gustura egon ziren entzuten, festara joandakoak eta han zebilen beste hainbat.
"Oso egun gozoa doa; aspaldi eduki dugun ideia onenetakoa izan da hau antolatzea", zioen Beristainek, ospakizun amaierako bazkaritara joan aurretik.