19:30ak jo bezain laster zirimiri fin batekin Mondragon Unibertsitateko Enpresagintzako Fakultate aurretik irten ziren Berdintxiketaneko parte hartzaileak. Bikoteka egiten den lasterketak herri gunerantz jo eta bertan 5 kilometro egin zituen. Korrikalariek ibilbideari hiru itzuli ematen zioten bitartean, zenbait txokotan, txalo eta animoen bitartez oñatiarren berotasuna nabaritu zuten.
Helmugan lehenak, hasierako metrotatik ziztu bizian ateratako Nerea Etxebarria eta Ruben Almendro izan ziren. Azkoitia eta Azpeitiko bikotea beste lasterketa misto batzuetan parte hartzetik datoz eta "bestearen erritmoa errespetatu behar dela", azpimarratu arren, egindako lehen postuarekin oso gustura geratu ziren.
Hirugarren edizio honetan, aurrekotan bezala, parte hartzea saritzeko lehen hiru bikoteez gain, azkenek ere euren saritxoa jaso zuten. Euripean bai, baina korrikalarien aurpegiak ikusi ostean, nabari da konpainia eta kirolak merezi izan zuela.