Partidua nahiko txarra izan zen, batez ere ikusleendako. Ez zen joko handirik ikusi ez alde batetik ezta bestetik ere. Lehenengo zatian etxekoak zerbait gehiago izan ziren; hala, baloiarekin hainbat aldiz irten ziren aurkariaren aterantz. Lehenengo gola partidua hasi eta ordu laurdenera etorri zen. Korner baten ondoren Ibai Morenok jaurti zuen baloia. Zuzenean sartu zuen sareetan. Gol polita izan zen.
Berdinketaren gola
Bigarren zatian Beti Gaztekoak indartsu irten ziren. Lehenengo minutuetan gola egiteko aukera garbia izan zuten; baina, Beti Gazteko jokalariak nahastu egin ziren area barruan. Handik minutu gutxira, eztabaidaren gola etorri zen. Julen Agirre Aloñako atezainak baloia eskuetan zuela lurrera erori zen, baloia aske utziz; hala, aukera hori aprobetxatu zuten aurkariek berdinketaren gola egiteko. Aloñako jokalari eta zaleek atezainari egindako falta eskatu zuten, baina epaileak ez zuen horrelakorik adierazi. Azkargorta entrenatzaileak epaileari esaten zion marrazainak banderatxoa jasota zuela.
Lesakarren pozak ez zuen asko iraun. Bost minutura Aloñak bigarren gola egin zuen. Jon Lertxundik barneratzea egin eta Unai Uribeetxeberriari egin zion pasea. Honek ez zuen barkatu.
Kronika guztia Asteleheneko Goiena paperean.