Udalak bueltatu egingo ditu gaztelera hutsean jasotako eskutitzak. Autonomia estatutuan jasota dagoen euskararen koofizialtasuna bete dadin eskatzea erabaki du modu horretara, udal gobernuak.
Espainiako gobernu ordezkaritzatik gaztelera hutsean iritsi diren eskutitzen harira hartu erabaki hori udal gobernuak. Azken hilabeteetan idatzi eta errekerimendu ugari bidali dizkio Espainiako gobernu ordezkaritzak Oñatiko udalari, besteak beste, Madrileko gobernuak erabaki dituen murrizketen berri emateko, Espainiako bandera udaletxean jartzeko errekerimendua edota presoen Euskal Herrira ekartzeko eskatzen duen banderola kentzeko agindua. Autonomia estatutuaren 6.1 artikuluak dio euskarak Euskal Herriaren berezko hizkuntza izanik, hizkuntza ofizialaren maila izango duela Euskal Herrian eta bermatzen du idatzi ofizialak bi hizkuntzatan eskuratzeko eskubidea.
Gaztelera hutsezko gutunak itzuli ez ezik, adierazpen administratibo guztiak euskaraz jaso gura dituela jakinaraziko dio udalak igorleari.